Аб урачыстым адкрыцці двух выстаў са збору Нацыянальнага мастацкага музея Рэспублікі Беларусь

24 кастрычніка 2017 года ў Нацыянальным мастацкім музеі Кітая адбылося ўрачыстае адкрыццё двух выстаў са збору Нацыянальнага мастацкага музея Рэспублікі Беларусь: “Шэдэўры Нацыянальнага мастацкага музея Рэспублікі Беларусь”, прысвечаных 25-годдзю з дня ўстанаўлення дыпламатычных адносін паміж Рэспублікай Беларусь і Кітайскай Народнай Рэспублікай, і “Выстава беларускай скульптуры Сяргея Селіханава і Канстанціна Селіханава”.

Экспазіцыю выставы “Шэдэўры Нацыянальнага мастацкага музея Рэспублікі Беларусь” (24.10.2017–12.12.2017) складаюць 57 жывапісных работ з калекцыі беларускага мастацтва ХIХ–ХХI стагоддзяў і рускага мастацтва канца ХIХ – пачатку ХХ стагоддзя. Гэты сумесны выставачны праект закліканы пазнаёміць жыхароў і гасцей Пекіна з выдатнымі палотнамі знакамітых майстроў рускага і беларускага мастацтва. Трохчасткавая структура выставачнага праекта дае магчымасць паказаць асаблівасці развіцця беларускага мастацтва ў кантэксце традыцый і сучаснасці, дае прыклад актыўнага творчага дыялогу майстроў розных пакаленняў, розных мастацкіх традыцый і стылявых інтарэсаў. На выставе прадстаўлены творы класікаў беларускага мастацтва ХIХ–ХХ стагоддзяў – І. Хруцкага, В. Бялыніцкага-Бірулі, С. Жукоўскага, М. Савіцкага, Г. Вашчанкі, М. Данцыга, В. Грамыкі, П. Масленікава, А. Кішчанкі, У. Стэльмашонка, работы сучасных беларускіх мастакоў У. Тоўсціка, В. Сумарава, В. Шкарубы, С. Катковай, І. Бархаткова, В. Касцючэнкі і інш.

Прадстаўленыя ў экспазіцыі творы беларускіх жывапісцаў перадаюць непаўторны каларыт, духоўную змястоўнасць і эмацыянальнасць нашага выяўленчага мастацтва, паказваюць пераемнасць вялікіх традыцый і нацыянальную адметнасць культуры Беларусі.

Да выставы падрыхтаваны аднайменны альбом “Шэдэўры Нацыянальнага мастацкага музея Рэспублікі Беларусь”.
У экспазіцыі “Выставы беларускай скульптуры Сяргея Селіханава і Канстанціна Селіханава” (18.10.2017–29.10.2017) прадстаўлены 115 твораў скульптуры і 16 твораў жывапісу і графікі Сяргея Селіханава і Канстанціна Селіханава са збору Нацыянальнага мастацкага музея Рэспублікі Беларусь, Бялыніцкага раённага мастацкага музея імя В.К. Бялыніцкага-Бірулі, Беларускага дзяржаўнага архіва-музея літаратуры і мастацтва і калекцыі сям'і мастака Сяргея Селіханава – дачкі Наталлі і ўнука Канстанціна.

Версия для печати