Супрацоўніцтва ў сферы адукацыі

Супрацоўніцтва Беларусі і Кітая ў сферы адукацыі развіваецца дынамічна. Рэгулюючым органам узаемадзеяння з'яўляецца створаная рэгулятарамі дзвюх краін Камісія па адукацыі Беларуска-Кітайскага міжурадавага камітэта па супрацоўніцтве.

Паміж Рэспублікай Беларусь і Кітайскай Народнай Рэспублікай дзейнічае міжурадавае пагадненне аб узаемным прызнанні дакументаў аб адукацыі і дакументаў аб вучоных ступенях. Афіцыйны тэкст дакумента даступны па спасылцы: https://pravo.by/document/?guid=12551&p0=I01900016

На сённяшні дзень паміж установамі адукацыі Рэспублікі Беларусь і Кітайскай Народнай Рэспублікі падпісана больш за 900 прамых дагавораў аб супрацоўніцтве. У рамках гэтых дагавораў рэалізуецца шэраг двухбаковых навуковых і адукацыйных праектаў, прадугледжаны акадэмічныя абмены, стварэнне сумесных структур.

У цяперашні час на базе ўстаноў адукацыі дзвюх краін функцыянуюць 23 Сумесныя адукацыйныя і навуковыя структуры (10 лабараторый, 10 цэнтраў і 3 інстытуты), пры гэтым за апошнія два гады іх колькасць павялічылася ў два разы.

Актыўна развіваецца ўзаемадзеянне ў рамках дзейнасці беларуска-кітайскай Асацыяцыі ўніверсітэтаў, удзельнікамі якой у цяперашні час з'яўляюцца каля 90 беларускіх і кітайскіх універсітэтаў.

Беларускімі ўстановамі вышэйшай адукацыі рэалізуюцца больш за 65 сумесных адукацыйных праграм з больш чым 35 установамі адукацыі КНР. Прапрацоўваецца стварэнне яшчэ больш як 20 сумесных адукацыйных праграм.

У Беларусі адкрыты ўжо сем інстытутаў кітаязнаўства імя Канфуцыя і восем класаў кітаязнаўства імя Канфуцыя. У сваю чаргу яны стварылі сетку сваіх філіялаў (кабінетаў Канфуцыя і цэнтраў па вывучэнні кітайскай мовы і культуры) у больш чым 50 установах адукацыі.

На базе кітайскіх універсітэтаў створаны ўжо дванаццаць цэнтраў вывучэння Беларусі. Вядзецца праца па стварэнні яшчэ двух падобных цэнтраў.